Loita na Rede: Plataforma Tarifa Plana Ya!
Aquí téde-la entrevista que lle fixemos ó responsable desta interesante campaña, Miguel Vinagre Álvarez, da ACCE (Asociacion Cántabra del Correo Electronico).
¿Cando naceu a Plataforma Tarifa Plana Ya?
Pois naceu hai cousa dun ano, a raíz dunha idea na área de FIDO de Comunicacións. Queixábase a xente de que debía existir unha tarifa cha para facer as comunicacións telemáticas máis baratas para un mellor aproveitamento desta e un verdadeiro fin, como a investigación, negocios, programación...
¿Cales son os seus obxectivos? ¿Cando se logren deixará de existir?
Os obxectivos son o da tarifa cha, ou polo menos darlles un pouco a brasa para que se dean conta de que estamos descontentos co servicio que nos prestan. De todos modos é unha cousa que obrigatoriamente hase implantar, coa liberalización das telecomunicacións, como ocorreu en Chile este ano. Cando logremos algo, evidentemente deixará de existir como tarifa
plana. Igual nos embarcamos noutro proxecto, pero quén sabe de qué, salvad las ballenas, reciclad papel, no a la censura en Internet... a min interésame facer presión e mellora-las cousas. E se teño tempo e podo non dubidarei en axudar no que poida.
¿Cales son as vosas accións? ¿Canta xente participa nelas?
Principalmente mandamos mensaxes a T e nun futuro, se algún
directivo despistado dá o seu enderezo por aí, bombardealo :) Agora queremos montar unha asociación de maneira que o poñamos legal, ou buscar unha asociación que nos represente.
Tamén pedimos que informen de nós os medios divulgativos como prensa , radio e se se pode TV.
Somos 2.800, non somos demasiados, pero sube a cifra cada día :)
Cando falades de Tarifa Cha... ¿de que coste aproximadamente a pedides? ¿Tedes en conta que a algunha xente sairálle máis caro con Tarifa Cha ca con Tarifa por Tempo como ate o de agora?
Por unha parte a tarifa cha será de libre contrato, se vas gastarte
máis por tela, non a contratas e santas pascuas, pero non creo que sexa o caso. É máis, os que gastan menos é que están preocupados por gastar demasiado, co que este problema se solucionaría.
O coste, en USA son unhas 2.500 ó mes o que se gastan en teléfono por este concepto. É previsible que o poñan a unhas 4.000 ou 5.000 e coa liberalización os prezos baixarán.
¿Que obstáculos existen para que se estableza a Tarifa Cha?
Tecnolóxicos (está sobresaturado e non te podes imaxinar cómo sería
despois) e que o Governo non quere renunciar ós pingües beneficios que sacan con T, e iso que non llo reducirían en moito. Ademais é un servicio público e non debería dar beneficios.
¿Quen sairá gañando máis coa Tarifa Cha? ¿As empresas proveedoras, as empresas utentes ou os particulares?
Todos:
E por outro lado en España aumentaría o número de servidores dando servicios, polo que se xeneran postos de traballo; poderíanse desenvolver programas share para Inet cousa que agora non se fai ...
Ben, estas son as motivacións e os obxectivos desta plataforma. Na vosa man está apoialos ou non, cada quen que saque as súas valoracións e actúe en consecuencia.
Casdeiro
En apoio a unha lingua: A CiberIrmandade da Fala
E aquí tedes outra entrevista a outra xente que anda na rede loitando polo seu: falamos polo e-mail co representante oficioso da Ciber-Irmandade da Fala (galega, por suposto).
¿Que é a Ciber-irmandade? ¿Cando naceu? ¿Quen a forman?
Pois a Ciberirmandade é unha pequena experiencia que ten como fin animar a todas aquelas institucións, empresas, etc... que son galegas ou teñen relación con Galiza e que se dan a coñecer na rede, que o fagan tamén no noso idioma. Levamos relativamente pouco tempo funcionando, dende fai 3 meses, e está formada por persoas que están interesadas en poder desfrutar da rede en galego.
¿Cales son as súas actividades concretas?
Hoxe en día a nosa principal actividade é o envío de e-mails a aquelas institucións que posúen páxinas WEB e que nós imos establecendo, por non ter unha opción de desfrutar de ditas páxinas en galego. Esto esta respaldado por medio dunhas páxinas de informacioon para aqueles ciberirmandiños que a requiran, como por exemplo información encol de lexislación básica de emprego do idioma, seccións de información estatística de emprego da lingua, etc.. Tamen estamos a confeccionar un pequeno boletín que analiza todo aquelo que foi saindo nos medios de comunicación encol da lingua e que mereze unha visión crítica pola nosa banda.
¿Que promoción ten? ¿Ídesvos dar a coñecer nalgún medio?
En principio a promoción é aquela que lle estamos a dar os propios membros naqueles ámbitos onde nos movemos. Esta asociación parte dun entendemento e organización entre os que a formamos, e polo de agora a xente que nos foi coñecendo foi gracias un achegamento pola súa banda.
Con respecto á segunda parte da túa pregunta, quéroche dicir que estamos invitados a asistir ó MITE'96, en Silleda, onde se vai producir o primeiro encontro galego de usuarios de INTERNET.
¿Cres que os usuarios galegos de Internet teñen un interese maioritario por ve-la súa lingua na rede?
Esto as veces é algo difícil de establecer, dígoo porque a maioria das persoas nos movemos xeralmente da maneira máis comoda posible con respecto á lingua. Quero dicir con isto que unha persoa que non teña unha serie de motivacións determidadas, sexan, políticas, culturais, etc..., tanto lle ten en qué lingua poda dispoñer dunha información, sempre e cando a entenda. Nesto temos unha desventaxe os galego-falantes, xa que somos unha lingua minoritaria que ademais estivo moi desprestixiada socialmente, e por riba ata fai moi pouco estaba totalmente apartada das escolas e o sistema educativo, polo que, en Galiza, ninguén tivo unha educación totalmente en galego, mais si unha grande maioria tívoa en castelán.
Isto condiciona moitísimo a actitude de cara á nosa lingua, e por suposto falo en todos os ámbitos nos que se require un emprego da lingua a nivel escrito -a nivel falado temos outro panorama-.
¿Pode extrapolarse a situación do galego en Internet á situación na sociedade real? ¿As empresas usan aínda menos o galego cando están en Internet?
Pois as veces semella que as empresas aínda empregan menos o galego na rede, suponno que por unha idea equivocada de que a rede está para comunicarte cos de moi lonxe??, e as veces é paradigmático, pero empresas que empregan o galego na súa propaganda en Galiza, teñen as súas páxinas en castelán, como se a Internet só poideran entrar os de fora. Ademais non se decatan da boa impresión que pode causar a unha persoa non galega ver que unha empresa é respectuosa coas súas tradicións, esto indica sempre un nivel cultural engadido, e permite ver a dita empresa non só dende un ponto de vista puramente economicista.
¿Queres citar algunhas empresas que se destaquen no seu uso do galego en Internet?
Cada vez van sendo máis, pero quixera destacar unha en especial, pola promoción do galego e a nosa cultura en xeral que está a ter na rede, e falo de Item:)aga, unha empresa de deseño que está a manter o barrio Galego VIEIROS, onde realmente moitos galegos temos un recuncho para ter información dos recursos que van aparecendo na rede encol de nós e por parte de nós os galegos. É un traballo moi loubable e sobre todo por parte dunha empresa que está a empregar recursos económicos, tempo, e persoal para esta tarefa.
¿Coñecéde-lo nivel de uso na rede doutras linguas en similar situación (catalán, euskera, gaélico, bretón, corso, etc.)? ¿Cal é en xeral o nivel de presencia das linguas minorizadas?
Eu coñezo o caso catalán, pero supoño que cada un destes casos é un puro refrexo do que ocorre na sociedade concreta. No caso catalán se pode observar un respecto moi alto cara á súa lingua, e ademais un uso a nivel comercial e institucional moi aceptable, pero esto é tamén resultado das políticas feitas polas súas institucioons, e a conciencia de pobo que ten hoxe en día o pobo catalán.
¿Tedes algún lema co que queiras rematar esta entrevista?
Por suposto: o noso lema, que empregamos sempre que se nos dá a ocasión -e esta é unha desas ocasioons :) - é En Galiza en galego e na INTERNET tamén.
Casdeiro
La Columna del Hipercrítico