BARSOWIA NÚMERO NOVE

Presentando unha ducia de nomes do país e dous ilustres convidados lusos, Barsowia 
continúa a ser a publicación de cómic mundial con máis autores galegos de banda 
deseñada... ¡E de primeira liña! Coa factura inmellorable dunha portada de Brais 
Rodríguez e un novo deseño de publicación de Álvaro López, o Barsowia é como 
sempre 100% cómic e contén catorce historias cun pleno case total do actual plantel 
do colectivo independente Polaqia.

Barsowia gañou o Premio do Público do Saló de Barcelona ao mellor fanzine de 
España en 2005 e este ano opta ao mesmo galardón na categoría oficial.

Abre o número unha historia do Oeste moi distinta ao típico duelo de pistoleiros: 
"Westernland", por un David Rubín en estado de graza e flamante acaparador de catro 
candidaturas aos premios de Barcelona. En "Domésticos", Kike Benlloch e Brais 
Rodríguez desvelan coma ninguén o que hai realmente tras iso ao que lle chaman  
verdadeira amizade... No seu estilo inconfundible, Susa Monteiro lévanos ao mar de 
sombras de "Adeus tristeza", mentres que Hugo Covelo asina nada máis e nada menos 
ca "O correo de Barsowia", e dá resposta ás innumerables misivas que invaden el 
Correo Imperial Polaqo. Jose Domínguez e Kike Benlloch en "O ladrón da choiva", 
Diego Blanco ("Tanque Familiar") nun relato sen título e, de novo, o gran Brais 
Rodríguez en "A pantasma de Breixo", usan con destreza o pincel a modo de bisturí 
para que afloren sentimentos que, a miúdo nos escapan no día a día. Mentres, o 
tándem formado por Andrea López e Kike Benlloch explora un universo onírico en 
"A igrexa do coñecemento", Roque Romero continúa a súa hipnótica evolución 
formal con "E vivirei no monstro". Paulo Monteiro realiza un impresionante 
despregue gráfico levándonos mediante "A canção do soldado" ás trincheiras da I 
Guerra Mundial. Tamén encontrarás un conto de bichos raros sen escrúpulos titulado 
"Recadadores" por Gochi e Kike e a continuación do universo de Álvaro López 
("Feliz Cumpleaños, May", "El Jardín Atómico") mediante un novo capítulo de 
"Habitación 13" iniciado no tomo "Barsowia en Chamas". Inicio tamén, e de luxo, o 
da serie de Emma Ríos ("A Prueba de Balas") para o Barsowia: Un western chamado 
"Entre os ollos" digno de competir coa mesmísima Deadwood. E como guinda final, 
Sergio Covelo fainos gozar de "Un día perfecto".

Barsowia#9

Creado por: David Rubín | Kike Benlloch | Brais Rodríguez | Susa Monteiro | Hugo 
Covelo | Jose Domínguez | Andrea López | Roque Romero | Paulo Monteiro | Gochi | 
Álvaro López | Emma Ríos | Diego Blanco | Sergio Covelo.

ISSN #1887-6226
Edita Polaqia
3,50 euros
56 páxinas
En distribución en abril'07
Textos en galego e portugués
http://polaqia.redegalega.org
polaqia@redegalega.org



Sobre Polaqia

Polaqia é un colectivo de autores galegos fundado en 2001 que ten publicado sen 
axudas públicas máis dunha vintena de cómics, a metade deles en galego. Ten 
divulgado obra de ducias de autores incluindo foráneos (creadores e creadoras 
alemás, franceses, holandeses, norteamericanos...) e na actualidade o colectivo, 
que xa prepara novidades editoriais para este verán, está formado por Hugo 
Covelo, David Rubín, Kike Benlloch, Sergio Covelo, Emma Ríos, Álvaro López, Luís 
Sendón, Jose Domingo, Bernal, Brais Rodríguez, Roque Romero e Diego Blanco, 
constituindo un dos máis activos núcleos de creación e edición independente no 
panorama ibérico.